Filastrocche

Tzirigheta, tzirigheta
mama tua est a sa festa
babu tuu est a traballai
tzirigheta torra a andai.

Mamaioa, mamaioa
bai a Santu Nicola
Santu Nicola de Casteddu
bettimì un aneddu
un aneddu pò sposai
mamaioa spar'a boai.
(bai in bon'ora e acuit'a torrai)
(mamaioa acuit'a torrai) 
(mamaioa torra a andai)

Scibita, scibita
coda de tzirighita
coda de tzirigheta
mama tua est a sa festa
babu tuu est a traballai
tzirigheta torra a andai.

Serra, serracu
no siasta macu
macu non siasta
binu non biasta
binu nieddu
su macu 'e Casteddu.

Serra, serra
pabas a terra
pabas a muru
su topi mudu
mudu su topi
bessit a dda noti
bessit a dda 'ì
su topi cuadì.

Nannaioni tenìat un gatu
candu ddu tzerriàt ddu currìat infatu
ddu tzerriat pisitu pisoni
cantaus is congius de Nannaioni.

Pibireddu, pibireddu
ita portas in su scateddu
ollu santu batiau
batiau in sa novena
Ave Maria gratzia prena.

Custu est su procu
custu d'at motu
custu d'at bruschiau
custu si d'at papau
a su piticheddu non d'ant lassau. 
(a su piticu nudda poita at scoviau.)

Maria Luisa, Maria Luisa
totu sa noti ballendi a camisa
totu sa noti ballendi a giponi
Maria Luisa pipiriponi.

Serra, serraddu
brancu 'e coraddu
brancu 'e argentu
tres liras e centu
centu e tres liras
comporaddu in piras
piras de oru
tzaracu moru
moru tzaracu
non siasta macu
macu non siasta
binu non biasta
binu de tzilleri
su macu palleri.

Babaloti, babaloti
su chi andat a da noti
su andat a da dì
a ti papai a tì.

Nai, nai
latt'e cani
latt'e procu
su barrocu
su pistocu
e sa pilada
spitzus a cù e nadiadas. 

Antoneddu, Antoneddu
tocca su campaneddu
toccad' a fot' a foti
chi s'ntendat in coti
in cot'e arroseri
bella mia mi feri
bella mia incarnada
a innui fust'andada?
A fai farranzina
farranzin'e totu is santus
apu intendiu un prantu
un prantu de dolori
mot'est su Senniori
motu e interrau
litara at imbiau
litara bona e scrita
su son'e sa trombita
su son'e sa cadena
Ave Maria gratzia prena.

A su duru duru e su nai nai
custa pippia non si morzat mai
mellus chi si morzat baca cun vitella
ca sa vitella si d'eus a papai
e sa pipia d'eus a coiai
a in chi, a in chi d'eus a giai?
A su fill'arricu de s'officiali
a issu, a issu ca tenit dinari
a issu, a issu ca tenit munera
issu d'at fai crapitas de seda
crapitas de seda e giponi de briai
a su duru duru e su nai nai.

Imboia, imboia
santa Itoria
santa Catanìa
seu intrada a cotilledda mia
apu boddìu una mentuedda
tzacara, tzacara sa nadiedda.